Kulindeleke ukuba avele kwinkundla ka Mantyi yaseKhayelitsha namhlanje umama weentsana ezimbini ezitshe zaluthuthu ngethuba kusitsha ityotyombe lakhe kwingingqi yase-Emsindweni, eMakhaza, ngentseni yangoMgqibelo umhla we-13 kwekaTshazimpunzi.
Lo mama, nominyaka ingama 31, unqakulwe wavalelwa izolo (ngoMvulo) ngezityholo zokungabinankathalo.
Isithethi samapolisa ephondweni uLt-Col Malcolm Pojie uthe eli tyala liphandwa licandelo elikhethekileyo nelijamelene nokhuseleko lwabantwana, iFamily Violence, Child Protection and Sexual Offences Unit ngabula marhanuga.
“Ipolisa elingumphandi libambe umama oneminyaka engama-31 nongumama wababantwana ngentseni yangoMvulo umhla we-15 kuTshazimpunzi nojongene namatyala amabini okungakhathali,” uthethe watsho uPojie.
Uhlabe ikhwelo kubazali ukuba bagcine iintsana zabo zikhuselekile ngalo lonke ixesha, ukuthintela iziganeko ezikumila kunje.
Ngokweengxelo ezingaqinisekiswanga eziphuma kubahlali, lo mama utshixele esi sibini ngethuba yena elahla umlenze. Ukanti ufike sele kwaphulwe ngethuba efika kwindawo yexhwayela, nalapho kuthiwa utsalelwe umnxeba ngomnye wabamelwane mayela nale ntlekela.